கன்னியாகுமரி நகர்ப்புற கண்காட்சித்திடல்: பூம்புகார், கன்னியாகுமரியில் ரூ.2.75 கோடி மதிப்பீட்டில் ஒரு நகர்புறக் கண்காட்சித் திடல் அமைக்கப்பட்டுள்ளது. இக்கண்காட்சித்திடல் 50 கடைகள், உணவுக்கூடம், ஓய்வரை, காட்சி அரங்கம், குதுந்தைகள் பூங்கா மற்றும் வாகனம் நிறுத்தும் இடம் ஆகிய வசதிகளைக் கொண்டுள்ளது. இந்நகர்புற கண்காட்சித்திடல் மூலம் மாதந்தோறும் சராசரியாக 50 கைவினைஞர்கள் பன்பெறுகின்றனர்.

மாமல்லபுரம் நகர்ப்புற கண்காட்சித்திடல் மேலும் சென்னையை அடுத்துள்ள மாமல்லபுரத்தில் ரூ.4.24 கோடி செலவில் மற்றுமொரு நகர்ப்புறக் கண்காட்சித்திடல் கட்டப்பட்டுள்ளது. இக்கண்காட்சி திடலில் உணவுகூடம், ஓய்வரை, காட்சி அரங்கம், குழந்கைகள் பூங்கா, கைவினைஞர்கள் தங்குமிடம் மற்றும் வாகனம் நிறுத்துமிடம் உள்ளிட்ட வசதிகளைக் கொண்டுள்ளது.

தமிழக அரசு மாநில புதுமை முயற்சி திட்டத்தின் கீழ் கைவினைஞர்களின் திறமைக்கான மின் தொகுப்பு களஞ்சியம் ஏற்படுத்த ரூ.1.00 கோடி நிதி வழங்கியுள்ளது. இது தமிழக கைவினைஞர்கள் அனைவருக்கும் நிலையான வடிவமைப்புடன் ஒவ்வொரு கைவினைஞருக்கும் தனி மின் பக்கங்களை கொண்ட மேம்படுத்தப்பட்ட, புரிந்து கொள்ளும் வகையில் உருவாக்கப்பட்ட மின் தொகுப்பு ஆகும். இம்மின் தொகுப்பின் மூலம் குறைந்த வருவாய் உடைய கைவினைஞர்கள் உயர்வு அடைவார்கள். தற்போது இந்நிறுவனம் 19,052 கைவினைஞர்களின் விபரங்களை பதிவு செய்துள்ளது. இத்தொகுப்பில் கைவினைஞர்கள் உற்பத்தி செய்யும் பொருட்கள் வாரியாகவும், சாதி மற்றும் பாலின வாரியாகவும் விவரங்கள் சேகரிக்கப்படுகிறது. இதன் மூலம் கணினியில் இக்கைவினைஞர்களின் விவரங்களைக் கண்டறிய முடியும். இந்த மின் தொகுப்பில் உறுப்பினராக இணைய www.poompuhar.com/artisan இணையதளத்தை தொடர்பு கொள்ளவும். இம்மின் தொகுப்பில் உறுப்பினராக இணைப்பு 2 மற்றும் 3 இல் குறிப்பிட்டுள்ள அலுவலர்களை அணுகலாம்.

பூம்புகார் நிறுவனம், ஒருங்கிணைந்த கைவினைப் பொருட்கள் மேம்பாடு மற்றும் வளர்ச்சி திட்டத்தின் மூலமாக ரூ. 5,000 மதிப்புள்ள இலவச உபகரணங்கள் 10,000 கைவினைஞர்களுக்கு வழங்கி வருகிறது. அபிவிருத்தி ஆணையர், (கைவினைப்பொருட்கள்) புதுடெல்லி அலுவலகம் மூலம் வழங்கப்படும் கைவினைஞர் அடையாளம் அட்டை (Pechaan card) உள்ளவர்கள் இத்திட்டத்தின் மூலம் பயன் பெறலாம்.

ஒருங்கிணைந்த கைவினைப் பொருட்கள் மேம்பாடு மற்றும் வளர்ச்சி திட்டத்தின் மூலமாக 13 பொது பயன்பாட்டு மையங்கள் ரூ. 780.00 இலட்சங்கள் செலவில் பல்வேறு கைத்திறத்தொழில்களில் அமைக்க உள்ளது. இதில் 6 பொது பயன்பாட்டு மையங்கள் மாண்புமிகு தமிழக முதல்வர் அவர்களால் 08.03.2018 அன்று துவக்கி வைக்கப்பட்டது. இதேபோன்று தமிழக அரசின் நிதி உதவியில் நலிந்த கைத்திறத் தொழில்களான பனை ஒலை, கோரைபாய், களிமண் மற்றும் சுடுகளிமண் ஆகிய கைத்திறத்தொழில்களில் ரூ.188.00 இலட்சங்கள் செலவில் 4 பொது பயன்பாட்டு மையங்கள் அமைக்க உள்ளது. இந்த பொது பயன்பாட்டு மையங்களில் கைவினைஞர்களுக்கு தேவையானா நவீன இயந்திரங்கள் பொருத்தப்பட்டுள்ளது. எனவே தேவைப்படும் கைவினைஞர்கள் இலவசமாக பயன்படுத்தி கைவினைப்பொருட்களை எளிதாக உற்பத்தி செய்து பயன் பெறலாம்.

கைத்திறப் பொருட்களை உற்பத்தி செய்யும் திறனை மேம்படுத்திக் கொள்வதற்காக இக்கழகம் 5 மாதம் / 2 மாதம் பயிற்சிகளை குறிப்பிட்ட கால இடைவெளிகளில் நடத்தப்பட்டுள்ளது. இத்தகைய கைத்திறப் பொருட்களை உற்பத்தி செய்வதற்கான திறமைகளைப் பெற ஆர்வமுள்ளவர்கள் காலமுறைதோறும் இக்கழகம் ஏற்பாடு செய்யும் பயிற்சித் திட்டங்களில் சேரலாம். இதன் மூலம் கைத்திறத் தொழில்களில் திறமைகளை வளர்த்துக்கொண்டு கைவினைப் பொருட்களை உற்பத்தி செய்வதை தொழிலாக மேற்கொள்ளலாம். பயிற்சிக் காலங்களில் பயிற்சி பெறுபவர்களுக்கு மாதந்தோறும் ரூ.7,500/- உதவித் தொகையாக இந்நிறுவனம் வழங்கியுள்ளது.ஒருங்கிணைந்த கைவினைப் பொருட்கள் மேம்பாடு மற்றும் வளர்ச்சி- திட்ட முன்னேற்றம் வ. எண் ஒப்பளிப்பு செய்யப்பட்ட திட்டம் ஒப்பளிப்பு செய்யப்பட்ட திட்டங்களின் எண்ணிக்கை செலவினத் தொகை (ரூ. கோடியில்) 1. பொது வசதி மையம் 11 5.40 2. கண்காட்சி 22 3.13 3. கிராப்ட் பஜார் 12 4. வடிவமைப்பு கருத்தரங்கு 27 1.23 5. ஒருங்கிணைந்த பயிற்சி 5 0.68 6. உபகரணப் பொருட்கள் 6,212 2.69 7. உற்பத்தியாளர்/ நுகர்வோர் கூட்டம் 1 0.11 மொத்தம் 13.24 மேற்கண்ட திட்டங்களின் மூலம் பயனடைய விரும்பும் கைவினைஞர்கள் இணைப்பு 1, 2 மற்றும் 3 இல் குறிப்பிட்டுள்ள அலுவலர்களை அணுகலாம்.

3D வடிவமைப்பு மற்றும் அச்சு தொழில் நுட்பத்தை பயன்படுத்தி ஒரு வடிவமைப்பு ஆராய்ச்சி மற்றும் வளர்ச்சி மையம் ஒன்றினை நிறுவியுள்ளது.

தமிழகத்தில் கைத்திறன் மேம்பாட்டுக்காக பங்களிப்பு செய்த சிறந்த 10 கைவினைஞர்களை தேர்வு செய்து இந்நிறுவனம் வருடந்தோறும் பூம்புகார் மாநில விருதுகளை வழங்கி வருகிறது. இவ்விருதுகள் ரூ.50,000/- ரொக்க பரிசு, 4 கிராம் தங்கப் பதக்கம், தாமிர பத்திரம் மற்றும் தகுதிச் சான்றிதழும் கொண்டதாகும். இவ்விருது பெற்ற கைவினைஞர்கள் 60 வயது அடைந்தவுடன் பொருளாதாரத்தில் பின்தங்கியவராக இருக்கும் பட்சத்தில் இந்திய அரசால் வழங்கப்பட்டு வரும் மாதாந்திர ஓய்வூதியம் ரூ.3500/- பெற தகுதி உடையவராகிறார்கள்.

2011-2012 ஆம் ஆண்டு முதல் “பூம்புகார் மாவட்ட கைத்திறன் விருது" என்ற புதிய விருது அறிமுகப்படுத்தப்பட்டது. இவ்விருது ரொக்கப்பரிசு ரூ.10,000/-, ஒரு வெள்ளி பதக்கம் மற்றும் ஒரு சான்றிதழும் கொண்டதாகும். ஒவ்வொரு ஆண்டும் 16 கைத்திறத் தொழில்களிலிருந்து 85 கைவினைஞர்களுக்கு இவ்விருது வழங்கப்படுகிறது. பெண் கைவினைஞர்களை ஊக்குவிக்கும் பொருட்டும், அவர்களுடைய சுய சார்பினை உறுதிப்படுத்தும் வகையிலும் மொத்த விருதில் 17 விருதுகள் பெண் கைவினைஞர்களுக்கு வழங்கப்படுகிறது.

தமிழ்நாட்டின் பாரம்பரியம் மிக்க கைத்திறத் தொழில்கள் நீடித்திருக்கவும் அவற்றை அடுத்த தலைமுறையினருக்கு கொண்டு செல்வதற்கும் இளைஞர்களை இத்துறையில் ஊக்கப்படுத்துதல் அவசியமாகிறது. இதனை செயல்படுத்தும் வகையில் 2013-2014-ஆம் ஆண்டு முதல் 30 வயதிற்குட்பட்ட இளம் கைவினைஞர்களுக்கு இக் “கைத்திறன் போட்டி", அறிமுகப்படுத்தப்பட்டது. இப்போட்டியில் 150 கைவினைஞர்கள் தேர்ந்தெடுக்கப்பட்டு அவர்களுக்கு ரூ.2000/- ரொக்க பரிசு, வெள்ளிப் பதக்கம் மற்றும் சான்றிதழ் வழங்கி கௌரவிக்கப்படுகிறார்கள். இப்போட்டிகள் முக்கிய கைத்திறப் பொருட்களின் மையங்களில் நடத்தப்படும்.

தமிழ்நாடு கைவினைப் பொருட்களை ஏற்றுமதி செய்பவர்களை ஊக்குவிக்கும் நோக்கத்தோடு “கைவினைப் பொருட்கள் ஏற்றுமதி விருது” 2014-2015-ஆம் ஆண்டு அறிமுகப்படுத்தப்பட்டது. இவ்விருது ரூ.2.50 இலட்சம் செலவில் ஒவ்வோர் ஆண்டும் இரு நபர்களுக்கு வழங்கப்படும். இவ்விருது ரூ.40000/- ரொக்கப் பரிசு, 4 கிராம் தங்கப்பதக்கம், ஒரு தாமிரப்பத்திரம் மற்றும் ஒரு சான்றிதழும் கொண்டதாகும்.

கைவினைப் பொருட்கள் கைவினைஞர்களைக் கொண்ட ஒரு குழுவினரால் தயாரிக்கப்படுகிறது. இக்குழுவில் தனிப்பட்ட ஒரு கைவினைஞரை விருதுக்காக இனம் காண்பது கடினமான செயலாகும். எனவே ஒரு குழுவாக பணிபுரிந்து ஒரு பொருளைத் தயாரித்த குழுவினரை கௌரவிக்கும் நோக்கில் “குழு உற்பத்தி விருது” அறிமுகப்படுத்தப்பட்டது. இவ்விருது ஒவ்வொரு ஆண்டும் 3 குழுக்களுக்கு ரூ. 3.75 இலட்சம் செலவில் வழங்கப்படுகிறது இவ்விருது ரூ.40000/- ரொக்கப் பரிசு, 4 கிராம் தங்கப்பதக்கம், ஒரு தாமிரப்பத்திரம் மற்றும் ஒரு சான்றிதழும் கொண்டதாகும்.

கைவினைஞர்களால் தயாரிக்கப்படும் பல கலைப்படைப்புகளும் பெரும்பாலும், அலங்காரம் சார்ந்தோ அல்லது மதம் சார்ந்தோ அமைகின்றன. எனவே பயன்பாடு சார்ந்த பொருட்களைத் தயாரிக்க கைவினைஞர்களை ஊக்குவிக்கும் நோக்கில், “பயன்பாடு சார்ந்த கைவினைப் பொருட்கள் விருது” அறிமுகப்படுத்தப்பட்டது. இவ்விருது ஆண்டுதோறும் 3 கைவினைஞர்களுக்கு ரூ.3.75 லட்சம் செலவில் வழங்கப்படுகிறது. இவ்விருது ரூ.40000/- ரொக்கப் பரிசு, 4 கிராம் தங்கப்பதக்கம், ஒரு தாமிரப்பத்திரம் மற்றும் ஒரு சான்றிதழும் கொண்டதாகும். மேற்கண்ட எட்டு விருதுகளும் ஒவ்வொரு ஆண்டும் தேர்ந்தெடுக்கப்பட்ட கைவினைஞர்களுக்கு வழங்கப்படுகிறது. விருதுகளுக்கான தகவல்களை பெற இணைப்பு-1ல் குறிப்பிடப்பட்ட அலுவலரை தொடர்பு கொள்ளலாம்.